ROXAS CITY, CAPIZ- Nagapabilin sa gihapon nga mahal ang presyuhanay sang produkto nga karne sang baboy sa merkado publiko, Teodoro Arcenas Trade Center (TATC), Roxas City, Capiz.
Sa interview sang Bombo Radyo kay Dionisio Arcunes, meat vendor sa TATC, ginapahayag nga nagapabilin nga mahal ang presyo sang baboy bangud sa nagapadayon nga pagpanghalit sang African Swine Fever (ASF) sa amu nga sapat.
Dugang pa sini, ang supply nga ginakuha sang tagsa ka mga manugbaligya sa amu nga merkado ang nagikan na sa Bacolod kag iban pa nga mga kaiping nga ka-probinsyahanan bangud wala na sang supply nagikan sa probinsya sang Capiz.
Nahibaluan nga yara sa gihapon sa P380 tubtob P400 ang presyo sa kada kilo sang baboy.
Pahayag pa ni Arcunes, nagasunod sila sa ginapatuman nga maximum suggested retail price (MSRP) sang Department of Agriculture (DA). Samtang, ginapangabay naman ni Arcunes ang mga kunsumidor nga intindihon sa karon ang presyuhanay sang amu nga produkto bangud sila mismo ang daku man nga naga-adjust.
