Wala sang pagtaas kag nagapabilin nga steady ang presyo sang baboy sa probinsiya sang Capiz.
Ini ang nangin pahayag ni Dr. Leonel Abordo, provincial veterinarian sang mapakig-angutan sang Bombo Radyo angut sa presyuhanay sang karne sang baboy.
Suno kay Abordo nga sa karon yara sa P240-260 per kilo ang presyo sang baboy depende sa parte nga pagabaklon kag P150-180 per kilo naman ang presyo sang isa ka dressed chicken.
Posible man ang pagnubo sa presyo sa pagsugod subong nga bulan sang Hulyo, Agosto kag Septiembre bangud natuon ini sa lean months ukon bulan sang tig-gulutum.
Indi man lipod kay Dr. Abordo nga ang rason sa pagbaligya sa mga talipapa kag kilid sang karsada sang pila ka mga meat vendors amo ang ila wala na pagbayad sa gina-ukupahan nga pwesto kumpara sa mga meat vendors sa TATC.
Apang nagpangabay ini sa mga meat vendors sa kilid sang karsada nga ila man tabunan ang ginabaligya nga baboy agud malikawan ang kontaminasyon.
Samtang ginkumpirma ni Dr. Abordo nga hilway sa gihapon ang Western Visayas kag probinsiya sang Capiz sa makamamatay nga African Swine Fever (ASF).
Nag-apelar man ini sang kooperasyon sang tanan nga buligan sila sa pagbantay sa mga nagasulod nga produkto gikan sa iban nga lugar.
Suno sa opisyal nga pananglitan may ma-monitor ang mga pumuluyo nga hinali pagkamatay sang mga baboy, gilayon sila nga pahibaluon ukon ang mga opisyales sa barangay agud ila ini mahimuan sang aksyon.
