Nagtaas ang retail price sang bugas sa una nga bahin sang Enero suno sa Philippine Statistics Authority (PSA).
Ang national average sang regular milled rice naglab-ot sa P43.39 kada kilo halin sang Enero 1-5, mas mataas kon ipaanggid sa P42.10 kada kilo sang ikaduha nga bahin sang Disyembre 2025 kag P41.38 sang una nga bahin sang Disyembre.
Pinakamataas ang presyo sang bugas sa Bangsamoro Autonomous Region in Muslim Mindanao (BARMM) nga nagalab-ot sa P49.12 kada kilo, samtang ang pinakamanubo ang yara sa Cagayan Valley nga nagalab-ot sa P36.49 kada kilo.
Apisar nga nagtaas kon ipaanggid sa Disyembre 2025, mas manubo gihapon ini kon ipaanggid sa amo man nga panahon sang Enero 2025.
Samtang, nagtaas man ang presyo sang manok sa una nga bahin sang Enero nga naglab-ot sa P213.88 kada kilo para sa dressed chicken. Mas mataas ini kon ipaanggid sa P212.40 kada kilo sang ulihi nga bahin sang Disyembre 2025 kag P210.67 sang temprano nga bahin sang Disyembre.
Suno sa PSA, mas mataas man ang presyo sang manok sini nga bulan sang Enero ipaanggid sa kapareho nga period sang 2025 nga yara sa tunga sang P211.24 tubtob P212.20 kada kilo, samtang padayon nga ginamonitor sang ahensya ang paghulag sang presyo sang mayor nga balaklon sa merkado.
