ROXAS CITY, CAPIZ- Amat-amat nga nagasaka ang presyo sang bugas nga ginapangbaligya sang mga rice retailers sa Teodoro Arcenas Trade Center, Roxas City, Capiz.
Sa interview sang Bombo Radyo Mr. Edilberto Cambe, President sang Roxas City Rice Retailers Association, iya ginpahayag nga ang pagsaka sang presyo sang bugas sa subong amo bangud sa pila ka mga rason.
Una, bangud sa gin-extend nga temporary rice importation sang Gobyerno, nagsaka ang presyo sang mga imported rice kag ang ika-duha amo ang mga nagkalain-lain nga mga kalamidad nga naekperyensyahan sa pungsod ang rason man sang pagsaka sang presyo sang mga locally produced rice.
Suno kay Cambe, yara sa P38 tubtob P45 kada kilo ang presyo sang lokal nga bugas, kag yara sa P53 tubtob P55 kada kilo sa imported nga bugas ang ila nga pagbaligya sa merkado.
Pahayag niya, ginaluaman pa sang mga rice retailers nga magasaka pagid ang presyo sang bugas ilabi na kag nagahilapit ang holiday season.
Gin-athag naman ni Cambe nga wala man sang shortage sa supply sang bugas.
Nagapangabay naman ang natungdan sa mga kunsumidor nga intindihon ang pagsaka sang presyo sang bugas nga ila ginabaligya bangud nga nagasunod lang man sila sa price guide nga gintalana sang mga natungdan.
Interviewed by Bombo Sunnie Mae Constantino Batencila
