ROXAS CITY – Dako ang posibilidad nga maapektuhan ang presyo sang harina, gatas, gasolina kag iban pa, bangud sa nagapadayon nga giyera sang Russia kag Ukraine.
Ini ang ginpahayag ni Ms. Ken Queenie Cuñada, director sang Department of Trade and Industry (DTI) – Capiz, sang mainterview sang Bombo Radyo.
Suno diri, ba-se sa ginpahibalo ni Joey Concepcion, Presidential adviser for entrepreneurship kag Go Negosyo founder, nga maapektuhan ang presyo sang balaklon sa Pilipinas, kag madamo pa nga pungsod.
Ginkumpirmar man ni Cuñada nga ba-se sa ila monitoring, may pagtaas sa presyo sang harina, matapos nga gin-lift na ang Automatic Price Ceiling (APC) bangud wala na sa idalom sang state of calamity ang Capiz.
Apang, ginpahayag man sini nga indi mahimo makapataas sang sobra sa Suggested Retail Price (SRP) ang isa ka negosyante.
Sa pihak nga bahin, nahatagan na sang safety seal sang DTI ang 28 ka mga establisiyemento sa Capiz.
Pila sa mga establisiyemento amu ang salons, supermarkets, grocery stores, hardware kag iban pa.
Ang safety seal ang isa ka aktibidad sang consumer protection unit sang DTI nga nagahatag sang kumpiyansa sa mga konsumidor.
Ini libre kag boluntaryo nga maproseso sang isa ka negosyante.
