Nagsaka ang presyo sang humay sa pila ka bahin sang bansa matapos gin-anunsyo ni Pressdente Ferdinand ‘Bongbong’ Marcos Jr. ang temporaryo nga suspensyon sang rice importation umpisa Setyembre 1, 2025.
Suno sa Department of Agriculture, narekord ang pagsaka sang presyo sa anom sa 13 ka mga nagapanguna nga rehiyon nga nagatanom sang humay, kalakip ang Central Luzon, Bicol, kag pila pa ka bahin sang Mindanao.
Sandig sa datos sang National Food Authority, naglab-ot sa kapin P20 kada kilo ang presyo sang mala nga humay sa Southern Mindanao, samtang, sa Cagayan Valley ang may pinakamanubo nga narekord nga presyo sa P14.43 kada kilo.
Paathag ni Agriculture Secretary Francisco Tiu Laurel, katuyuan sang import ban nga buligan ang mga mangunguma nga nalugi na sadto bangud sa pagtibusok sang presyo sang palay sa P8 kada kilo—mas manubo pa sa gastos sa produksyon.
Ginsiling pa sang DA nga posible palawigon ukon padasigon ang import ban depende sa hulag sang presyo sa merkado.
