Naglab-ot na sa P6.00 ang gintaas sang presyo sa kada tray sang itlog sa Teodoro Arcenas Trade Center (TATC).
Ini ang ginpakigbahin ni Nanay Nene, isa sa mga manugbaligya sang itlog sa merkado sang mainterview sang Bombo Radyo Roxas.
Mahibaluan nga sa karun ang ila capital sa Jumbo nga itlog yara na sa P280.00 kag ginabaligya sang P350.00, Extra large P270.00 kag ginabaligya P275.00, Large P270.00 kag ginabaligya P285.00, Medium P251.00 kag ginabaligya P260.00, kag Small nga may capital Small P186.00 kag ginabaligya P225.00.
Mahimo man suno diri nga makabakal ang mga konsumedor sang binilog kung sa diin ang presyo nagasugod sa P8.00 tubtob P11.00 depende sa pagabaklon.
Suno kay Nanay Nene, isa sa ila ginalantaw nga rason sa dako nga pagsaka sang presyo amu ang kakulangon sang suplay sa merkado.
Apang, ginpahayag man sini nga sa pihak sang pagsipa sang presyo madamo sa gihapon ang nagabakal sini.
