ROXAS CITY, CAPIZ – Amat-amat na nga nagataas ang presyo sang karne sang baboy sa Teodoro Arcenas Trade Center samtang nagahilapit ang Paskwa kag Bag-ong Tuig.
Sa interview sang Bombo Radyo kay Roberto Ross Roldan, manugbaligya sa meat section sang Teodoro Arcenas Trade Center, iya ginpahayag nga bangud sa mataas nga demand sang karne sang baboy rason nga may paghulag man sa presyo.
Suno kay Roldan, yara na sa P195 tubtob sa P200 per kilo ang live weight sang isa ka baboy rason nga nagalab-ot sa P320 per kilo ang karne sang baboy sa merkado.
Samtang, yara naman sa P320 tubtob P420 ang kilo sang karne sang baka kag karabaw depende sa parte nga pagabaklon.
Pahayag pa niya, bastante ang supply sang karne sang baboy bangud madamo nga mga lugar ang ginakwaan sang mga manug baligya.
Dugang pa sang natungdan, mangin mabusisi sa pagpili sang pagabaklon nga karne, magbakal lang sa lehitimo nga balaklan agud nga masiguro ang kalimpyo kag kalidad.
