Sa pihak sang promisa sang Iran nga pahanugutan ang luwas nga pag-agi sang mga kargamento sang langis nga padulong sa Pilipinas paagi sa Strait of Hormuz, impossible nga magnubo gilayon ang presyo sang mga produktong petrolyo.
Matandaan, nakuha sang gobyerno sang Pilipinas ang amo nga pasalig matapos ang pag-istoryahanay sa telepono ni Foreign Affairs Secretary Ma. Theresa Lazaro kag Iranian Foreign Minister Seyed Abbas Araghchi sang Huwebes.
Suno sa pahayag sang Department of Foreign Affairs (DFA), ang importante nga punto sang kasugtanan amo ang pagpasalig sang kaluwasan indi lamang sang mga barko nga may bandera sang Pilipinas nga pila lamang kundi pati man sang mga kargamento sang “energy sources” nga nagapadulong sa Pilipinas, lakip na ang krudo, produktong petrolyo, kag natural gas.
Base sa data sang Department of Energy (DOE), 98% sang imported crude oil sang pungsod ang naghalin sa Middle East. Samtang, mga 97% sang liquid petroleum products, kaangay sang diesel, gasolina, kag kerosene ang naghalin sa mga pungsod sa Asya nga masami nagaproseso man sang langis halin sa Middle East.
