Pila na lamang ka adlaw antes mag-abot ang Paskwa, masako na ang pila ka pamilya nga Pilipino sa pagplano kag pagtipon para sa tradisyunal nga handa sa Noche Buena.
Kaupod sini, ginatutukan man sang mga nagakaigo nga ahensya ang pagbag-o sang presyo sang mga nagapanguna nga balaklon kag rekados agud masiguro nga masarangan kag praktikal ang pagpamakal sang publiko para sa palaabuton nga okasyon.
Indi gid madula sa lamesa ang isa sa pinakapopular kag tradisyunal nga pagkaon sa Pilipinas nga masami ginahanda kun may okasyon kag ginakabig nga simbolo sang malawig nga kabuhi.
Ang bihon nagabalor sang 45 pesos kada putos, samtang ang pancit canton yara sa 30 pesos. Ang spaghetti naman nagabalor sang 55 pesos ang tunga nga putos kag 90 pesos ang isa ka bug-os nga putos.
Sa mga panguna nga sangkap sini, ang tomato sauce nagabalor sang 35 tubtob 55 pesos, depende sa kadakuon kag brand. Para sa gatas, ang evaporada yara sa 25 tubtob 40 pesos, samtang ang kondensada yara sa 40 tubtob 60 pesos.
Sa panghimagas naman, yara ang mga kakanin nga masami nagagamit sang malagkit nga bugas nga nagabalor sang 57 tubtob 65 pesos kada kilo. Kun kamoteng kahoy naman ang gamiton, nagabalor ini sang 40 tubtob 65 pesos.
Para sa mga nagapreparar sang mainit kag manamit nga sud-an, lakip sa masami ginahanda ang lumpia, menudo kag caldereta.
Sa presyo sang karne, ang baboy nagabalor subong sang 290 tubtob 400 pesos kada kilo, depende sa parte nga baklon, samtang ang isa ka bug-os nga manok nagabalor sang tubtob 170 pesos.
