Padayon nga nagtaas ang mga presyo sang residential property sa pungsod sa una nga quarter sang tuig apang sa mas mahinay nga kadasigon kon ipaanggid sa pagtaas nga narekord sa ikaapat nga quarter sang 2024, suno sa Bangko Sentral ng Pilipinas (BSP).
Sa isa ka report nga ginpaguwa sang Biyernes, ang BSP nagsiling nga ang Residential Property Price Index (RPPI) sa bug-os nga pungsod naghinay halin sa 9.8 porsyento sa ikaapat nga quarter sang 2024 pakadto sa 7.6 porsyento sa una nga quarter sang 2025.
Ang National Capital Region (NCR) ang nakarekord sang pinakamataas nga pagtaas sa sulod sang period nga naglab-ot sa 13.9 porsyento.
Para sa mga lugar sa guwa sang NCR, ang presyo sang real property nagtaas sang 3 porsyento.
Kon parte sa mga kategorya, ang mga yunit sang condominium kag mga balay pareho nga nakaamot sa pagtaas sang presyo sang propiedad.
Ang presyo sang condominium unit nagtaas sang 10.6 porsyento, samtang ang presyo sang balay nagtaas sang 4.5 porsyento.
Ang Residential Property Price Index (RPPI) isa ka talaksan sang average nga pagbag-o sa mga presyo sang nagkalainlain nga sahi sang mga housing units sa pagligad sang panahon, base sa datos gikan sa mga bangko sa aktwal nga mga pautang nga ginhatag para sa pagbakal sang mga propiedad nga ginapuy-an.
Isa ini sa key indicators nga ginabantayan sang BSP sa pag-usisa sang mga kondisyon sang merkado sang real estate kag pautang sang pungsod.
Ginpahayag sang BSP nga ang bag-o nga ginlunsar nga Residential Property Price Index (RPPI) nagasunod sa global best practices kag ginakabig nga mas masaligan nga sukatan sang housing price trends kon ipaanggid sa nauna nga index
Ang Bangko Sentral ng Pilipinas nagsugod sa pagproseso sang impormasyon parte sa real estate gamit ang first-quarter 2025 data para sa RPPI, nga nagbulos sa Residential Real Estate Price Index.
