Padayon nga nakaapekto ang pagsaka sang presyo sang langis sa industriya sang sardinas sa pungsod, nga nagtulod sa Department of Trade and Industry (DTI) nga makigsapol sa mga manufacturers angut sa posible nga pag-adjust sang presyo sini sa merkado.
Suno sa report, humalin pa sang Marso, nagapatigayon sang konsultasyon ang DTI sa mga sardine producers agud mahibaluan ang epekto sang mataas nga presyo sang gatong sa ila gasto sa produksyon.
Ginakabalak-an man sang ahensya nga mahimo ini magdul-ong sa pagtaas sang retail prices sang sardinas, isa sa pinakabarato nga pagkaon para sa madamo nga mga Pilipino.
Sa subong, yara sa tunga sang ₱15 tubtob ₱21 suggested retail price (SRP) sang de-lata nga sardinas, depende sa tatak.
Padayon ang pagmonitor sang DTI sa sitwasyon agud mapabilin ang balanse sa kaayuhan sang mga konsumidor kag manufacturer.
