Ginalauman sang Department of Agriculture (DA) nga mahimo magsaka sang 15% tubtob 20% ang presyo sang mga utan bangud sang epekto sang habagat ukon Southwest Monsoon kag apat ka mga bagyo sang nagligad.
Suno kay DA spokesperson Arnel de Mesa, masami nga nagasaka sang 15% tubtob 20% ang presyo sang mga utan kun maapektuhan sang nasambit nga weather disturbance ang produksyon.
Ginpahayag sang DA nga labi nga mabatyagan ang epekto sa presyo sang lowland vegetables, bangud naapektuhan sang habagat kag mga bagyo ang Central Luzon kag Southern Tagalog, nga importante nga mga lugar sa produksyon sang utan.
Posible man nga magsaka ang presyo sang mga upland vegetables sa Cordillera Administrative Region (CAR), nga isa sa mga nagapanguna nga producer sang amo nga mga produkto.
Apang, ginpahayag ni De Mesa nga mahimo magbalik gilayon ang produksyon sang utan bangud mas madasig ini maka-recover kun ipaanggid sa iban nga agricultural crops.
Suno sa final assessment sang DA, naglab-ot sa P4.38 billion ang kabug-usan nga damage kag losses sa sektor sang agrikultura bangud sang habagat kag mga bagyo nga Luis, Maymay, Neneng, kag Pilandok.
Nagresulta man ang mga weather disturbance sa production losses nga naglab-ot sa 102,791 metric tons sang nagkalain-lain nga agricultural commodities.
