Amat-amat na nga nagasaka ang presyo sang pila ka klase sang bulak sa mga balaligyaan subong nga nagahilapit ang tigkalalag kag All Souls’ Day, bangud sa pagnubo sang supply sini sa merkado.
Sa interview sang Bombo Radyo kay Manuel Lozada, isa ka flower vendor, iya ginpahayag nga may pagmahal sa presyo sang pila ka klase sang bulak nga ila ginabaligya bangud sa kakulang sang supply halin sa ila mga supplier.
Suno kay Lozada, isa ini sa mga rason nga nagataas ang presyo sang bulak, ilabi na nga nagadamo ang mga nagabakal sini bilang preparasyon sa pagbisita sa mga lulubngan sang ila mga pinalangga nga napatay.
Dugang pa sini, ang pagtaas sang presyo ang nagadepende man sa klase sang bulak kag sa kadamuon sang supply nga ila nabaton halin sa mga supplier. Gani, may pila ka klase sang bulak nga mas mataas ang presyo kumparar sang naandan nga balor sini.
Samtang, ginapaabot nga mas madamo pa ang magabakal sang bulak subong nga hapon tubtob bwas, bangud kabahin ini sang tradisyon sang mga pumuluyo sa pagdumdum kag paghatag padungog sa ila mga pinalangga nga napatay.
Sa pihak sini, mahimo nga magdepende sa supply kag demand ang presyo sang mga bulak sa mga masunod nga adlaw sang tigkalalag.
