Nagtaliwan na ang veteran American singer nga si Connie Francis sa edad nga 87.
Ginkumpirmar sang iya abyan nga si Ron Roberts sang Huwebes, duha ka semana pagkatapos nga naospital siya bangud sang grabe nga kasakit.
Madumduman nga si Connie, ang natawo sa Newark, New Jersey sang 1937 bilang Concetta Rosa Maria Franconero, kilala sa mga ambahanon nga “Pretty Little Baby,” “Everybody’s Somebody’s Fool,” kag “Who’s Sorry Now?” Isa man siya sa pinakapopular nga babaye nga manugkanta sang dekada 1950 kag 60, kag ang una nga babaye nga nakalab-ot sa #1 sa Billboard Hot 100.
Sang Hulyo 2, gindala si Connie sa isa ka ospital sa Florida kag ginpaidalom sa serye sang mga test. Sa iya pinakaulihi nga mga post sa social media, ginpahayag sini nga nag-ayo na ang iya pamatyag kag naga-ayo sa idalom sang maid-id nga pag-atipan sang mga doktor.
Bisan pa nga nagretiro sia sa musika sang 2018, ang iya ambahanon nga “Pretty Little Baby” bag-o lang nagtuhaw liwat sa TikTok kapin sa 60 ka tuig pagkatapos ini una nga ginpaguwa.
Si Connie kilala man sa iya mga paghimakas sa personal nga mga hangkat. Biktima sia sang pagpanglugos, nadula ang iya tingog bangod sang operasyon, kag nadula ang iya utod sa mafia.
Gin-record niya ini sa iya memoir nga “Who’s Sorry Now?” sang 1984, pagkatapos sang pag-attempt nga mag-suicide.
Bisan pa sa tanan, nangin tigpamaba sia para sa mga biktima sang kapintasan, kag nagtrabaho upod sa administrasyon ni Reagan para sa isa ka kampanya batok sa krimen.
Samtang, ang iya mga ambahanon ginakilala karon nga padayon nga nagahatag inspirasyon, kag ginadumdom bilang tingog sang iya henerasyon.
