ROXAS CITY – Nagpalab-ot sang reklamo sa Bombo Radyo ang indi na luyag mag pahingadlan nga ginikanan bangud sa nadangatan sang iya bata kag hinablos nga babayi nga ginapahayag biktima sang hazing bangud gin-‘paddle’ ang ila hita gamit ang rifle sa ROTC.
Sandig sa tagreklamo nga luyag lang nila nga maaksyonan kag mauntat ang ginapatigayon nga iligal nga bulohaton sang indi na paghingadlan nga bulothoan.
Suno pa diri, nga tuman ka lapad sang lagob nga naangkon sang biktima kag nagakahangawa ini sa madangatan sang iban pa nga estudyante.
Nahibaluan nga first year college ang amu nga estudyante.
Samtang, sa pagpakig-angut sang Bombo Radyo sa Criminology Department nga naga-handle sang ROTC sa ginareklamo nga bulothoan, nga suno diri, nakalab-ot na sa ila talatapan ang amu nga reklamo kag nagapatigayon na sang nagakaigo nga tikang para diri, apang ginatugyan ang paghatag sang opisyal nga pahayag sa ila higher office.
Matandaan nga may layi nga R.A. No. 8049 ukon ang ‘Anti-Hazing Law’ nga gin-amyendahan sang R.A. 11053 nga ginpirmahan ni former President Rodrigo Duterte nga nagabawal sa anuman nga sahi sang hazing ukon initiation rites sa fraternities kag sororities sa pungsod.
