ROXAS CITY – Otomatiko nga price freeze sa sulod sang 60-dias ang mga nagapanguna nga balaklon kadungan sang pagpaidalum sang probinsya sang Capiz sa state of calamity.
Ini ang ginkumpirmar ni Ms. Ken Queenie Cuñada, pinuno sang Department of Trade Industry (DTI) sang mainterview sang Bombo Radyo.
Suno diri, bangud ginpahamtang ang probinsya sa state of calamity indi pwede nga makapasaka sang presyo ang mga negosyante masobra sa gintalana nga suggested retail price (SRP) sa mga nagapanguna nga produkto ilabi na ang basic necessities and commodities.
Ba-se sa monitoring sang DTI, wala pa sang may nadakpan ang ahensya nga nagapasaka sang presyo kag naga-pamintaha nga mga negosyante sa mga kunsumidor.
Pananglitan may yara madakpan ang ahensya, magabaton ini sang sanction kag magapangaatubang sa kaso nga paglapas sa Price Act.
Dugang pa sini, nagsugod ang price freeze sang Abril 19, 2022 kag maga-dugay tubtob Hunyo 18, 2022 kadungan sang pagdeklarar sang state of calamity.
Panugyan ni Cuñada, nga magabulig ang ahensya sa mga negosyante agud makabangon liwat sa krisis kag padayon ang pag-monitor sang DTI sa mga negosyante nga naga-pamintaha kag paga-protektahan ang kinamatarong sang mga kunsumidor.
