ROXAS CITY – Pormal nga nagpadala sang sulat ang mga katapo sang Parents-Teachers Association (PTA) sang Feliciano Yusay Consing National High School sa National Bureau of Investigation (NBI)-Capiz nga nagahinyo nga imbestigaran ang ila School Principal nga si Dr. Quinto Tagoc Jr., Bookkeeper nga si Mr. Ronald Golero kag Administrative Officer nga si Mr. Mark Philippe Besana, bangud sa ginaalegar nanari-sari nga anomaliya.
Sandig sa ginpadala nga sulat napetsahan Oktubre 5, 2022, nasaad diri nga ginhimo ang request pinaagi sa Board Resolution No. 4 series of 2022 kun sa diin pirmado sang mga miyembro sang PTA.
Nakasaad sa resolusyon ang mga reklamo sang officers kaangay sang anomaliya nga transaksyon sang ila boluthoan kag sa tunga sang ila nagaisahanon nga supplier; pagkakas sang principal sa Bids and Awards Committee nga wala sang mapakita nga detalye, kun sa diin suno diri, paglapas sa IRR sang RA 9184 ukon Government Procurement Reform Act; ginaalegar pagbaton sang principal sang suweldo nagikan sa duha ka separado na eskwelahan – Rizal Elementary School kag sa ila sa FYCNHS; maanomalya nga procurement gamit ang MOOE nga ginpresentar sang 3rd quarter SMEA; pila ka mga reklamo nagikan sa mga babayi sini nga kaupdanan sa ginaalegar sexual acts; pagdesignar kay Mr. Mark Philippe Besana bilang Administrative Officer 1 bilang Supply Officer nga suno sa mga tagreklamo wala sang nagakahinabo nga check and balance kag wala pagsunod sang principal sa School Improvement Plan nga basehan para sa AIP kag APP.
Nagalaom ang katapo sang PTA sang madasig nga aksyon nagikan sa NBI-Capiz.
