ROXAS CITY – Gin-aksyunan na sang pamunuan sang Venancio Alba Elementary School ang report nga paggamit sang mga pamatan-on sa mga hulot sang buluthuan bilang lodging house.
Ginpahayag ni Mr. Adan Dalmacio, principal sang Venancio Alba Elementary School nga matapos nabaton ang impormasyon gikan kay punong barangay Siolly Andrade, gilayon sini nga ginpabalik duty ang ila nga watchman sa diin pagakuhaon ang sweldo sini sa MOOE sang eskwelahan.
Mangin trabaho sang watchman ang pagroving sa kagab-ihon sa compound sang buluthuan kag pagsiguro nga indi na makasulod pa ang mga kabataan kag makahimo sang kabastusan.
Magluwas diri, ginpahamtangan man sang kandado ang gate agud matsekyar sang watchman ang nagaagi nga mga indibidwal, bangud kilala man sini halos ang mga residente nga nagapuyo sa likod sang eskwelahan.
Aminado si Dalmacio nga indi pa siya ang principal sang buluthuan, nagaguwa na ang estorya nga paggamit sang mga hulot klasehan bilang palautwasan sa kainit sang ila lawas sang mga pamatan-on sa disoras sang kagab-ihon.
Gintuyo sadto ni Dalmacio nga saraduhan ang gate sa likod, apang ginkaakig ini sang mga residente nga nagaagi sa compound mismo sang eskwelahan.
Sa karon may instruksyon sa watchman nga tsekyaron ang nagasulod sa eskwelahan sa oras nga wala na sang klase kag pananglitan nga indi ini mga residente, gilayon nga sitahon.
Nagapati ang principal nga ini ang pinakamaayo nga pamaagi agud matapna ang ginahimo nga kabastusan sang mga kabataan.
