ROXAS CITY – Ginpanginwala sang tagdumalahan sang Feliciano Yusay Concing National High School ukon former Cabug-cabug NHS sang President Roxas, Capiz ang tanan nga mga alegasyon nga ginahaboy sa iya sang Parents-Teachers Association (PTA) sang ila bulothoan, nga ginpalab-ot sa National Bureau of Investigation (NBI)-Capiz.
Sa interview sang Bombo Radyo kay Dr. Quinto Tagoc, Jr., ginpahayag sini nga wala ini makabaton sang kopya sang reklamo sa iya, kag nabatian niya nalang sa Bombo Radyo ang amu nga isyu.
Suno sa principal, wala sang kamatuoran ang tanan nga alegasyon sa iya sang PTA President kag nagapati ini nga may mga manunudlo nga amu ang yara sa likod sang reklamo kag gingamit lang ang PTA President agud gub-on ang iya pagkatawo, ukon posible nga himu-himo lang sang PTA President ang reklamo bangud masobra duha pa lamang ini ka semana nga gin-install bilang PTA president.
Ginhimay-himay man ni Tagoc ang mga anomaliya nga nakasaad sa sulat nga ginpadala sang mga tagreklamo sa NBI.
1. Ginpanindugan sini nga barato ang baligya sa ‘Sharmaine’ nga supplier kag wala ini nagaisahanon nga supplier sang eskwelahan bangud indi ini allowed sa COA
2. Wala sini gin-abolish ang Bids and Awards Committee kag sa gihapon functional ini
3. Gin-aku sini nga nagikan ini sa Rizal Elementary School apang indi matuod nga nagabaton ini sang double compensation bangud may clearance ini nga ‘cleared’ sa tanan nga obligation kag no pending cases sa iya ginhalinan nga eskwelahan
4. Wala sang may gin-forge nga resibo ang iya assistant principal nga si Mr. Minard Abarra bangud transparent ini sa School Monitoring Evaluation and Adjustment (SMEA) kun sa diin ginapresentar ang accomplishment and expenses kag ginavaidate sang DepEd, kag pagkatapos ma-validate, iga-evaluate ini sang DepEd kag gina-imbitar ang Punong Barangay, Representative sang ahensya kag ara ang ina ang presensiya sang PTA President
5. Ginpanginwala man sini ang reklamo nga sexual act sa mga kaupdanan nga maestra bangud suno diri, may babayi man ini nga bata kag isa man ka maestra rason nga ginarespeto niya ang mga kababainhan
6. Indi pa ini ang principal, admin officer kag subong man supply officer na si Mr. Mark Philippe Besana sa ila bulothoan kag
7. Ginsunod sini ang SIP kag AIP bangud may justification ini nga gina-required sang COA.
Sa karon, wala pa ini sang personal nga plano batuk sa mga tagreklamo, apang kun ang iya abogado ang pahambalon luyag na sini nga pasakaan sang kaso ang mga nagreklamo sa iya, sa pagguba snag iya pagkatawo.
Ginpasalig sang principal nga magakooperar ini sa pagahiwaton nga imbestigasyon sang otoridad.
