ROXAS CITY – Ginpaguwa sa Capiz Rehabilitation Center (CRC) kag ginpa-ubra sa balay sang prison guard ang isa ka priso nga ginpamatbatan nga mapreso sang 12 tubtob 16 katuig sa kaso nga homicide.
Ini ang ginkumpirmar ni Mr. Arjuna Yngcong, Provincial Jail Warden sang Capiz Rehabilitation Center (CRC) sang mainterview sang Bombo Radyo.
Suno kay Yngcong, natabo ang insidente sang Enero 17 sa diin wala man ini sa CRC bangud sa importante nga transaksyon sa Bureau of Jail Management and Penology (BJMP).
Nakabaton na lang ini sang impormasyon, nga ginaalegar ginpaguwa sang prison guard ang priso kag gindala sa ila balay agud paubrahon.
Natigayon ini makumpirma matapos nakit-an sa kuha sang CCTV ang priso nga gina-escortan sang prison kag auxiliary guard samtang nagaguwa sa jail facility padulong sa direksyon sang balay sang prison guard.
Ginkumpronta man sini ang mga naulamid nga persona kag diri man gin-aku sang auxiliary guard kag priso nga nagguwa ang mga ini kag nagpadulong sa balay sang prison guard.
Apang iba ang nangin pahayag sang prison guard, suno diri gindala sini paguwa ang priso agud magsukat sang steel railing sa guwa sang jail facility.
Natukiban man ni Yngcong, nga nahibaluan man ini sang mga kaupdanan apang wala sang nagpangisog nga magsugid bangud mataas ini nga opisyal.
Dugang pa ni Yngcong, makabig nga criminal offense ang amu nga hitabo ilabi na nga ginpaguwa sa jail facility ang priso nga natalana na pagadal-on sa Muntinlupa.
Sa karon, ginatugyan na ni Yngcong ang imbestigasyon sa Capiz Provincial Government.
