ROXAS CITY, CAPIZ – Ginpatpat sang isa ka Aviation Expert ang posible nga rason sang pag-crash sang Indian Airline nga ginkapatay sang masobra sa 200 ka tawo.
Sa eksklusibo nga interview sang Bombo Radyo Roxas kay Sweden Lozada Labordo, isa ka First Officer sa isa ka pribado nga airline company, iya ginpahayag nga daku ang posibilidad nga nag-ugat ang insidente sa mechanical failure nga mahimo nga naghalin sa indi bastante nga maintenance kag pag-inspeksyon sa eroplano.
Suno kay Labordo, kun may madugay na nga isyu sa makina ukon sistema sang eroplano kag wala ini naaksyunan gilayon, mataas ang tsansa nga magtuga ini sang trahedya sa kahawaan.
May mga report nga nagasiling nga nakaeksperyensya sang communication breakdown sa tunga sang piloto kag control tower pila ka minutos antes dalayon nga nag-crash ang eroplano.
Kritikal suno diri ang koneksyon sang piloto kag air traffic control. Sa mga kasubong sini nga tinion, bisan pila ka segundos sang pagka-delay ang mahimo nga magresulta sa disgrasya.
Ginpaathag man sang aviation expert ang importansya sang flight data monitoring kag regular nga safety audit, ilabi na sa mga airline nga may na-record sang nagligad nga mga insidente.
Ginpunto man ni Labordo nga indi mahimo nga ipaiway ang posibilidad sang human error, ilabi na kun may kakulangan sa training ukon kun sobra nga kapoy ang flight crew.
Sa karon, nagapadayon ang imbestigasyon sang mga otoridad sa India agud hibaluon ang matuod nga rason sang insidente.
Ginahulat man ang resulta sang black box analysis nga makahatag sang kaathagan sa mga ulihi nga minutos sang flight.
Padayon nga nagapanawagan si Labordo sa publiko kag mga airline company nga pasangkaron ang kultura sang kaluwasan sa industriya sang aviation agud malikawan ang mga kasubong nga trahedya sa ulihi.
