Mainit nga gin-abi-abi ni Governor Fredenil H. Castro si Police Brigadier General Randulf T. Tuaño, Regional Director sang Police Regional Office 6 (PRO-6), sa command visit sini sa Capiz Provincial Police Office (CPPO) Camp Teodorico C. Apil sa Barangay Lanot, Roxas City, Capiz, sini nga Oktubre 5, 2026.
Kabahin sa pagbisita ni Tuaño ang paghatag sang pagpasidungog kag pag-apresyar kay Governor Castro tungod sa iya padayon nga suporta sa Project RTT3389, isa ka inisyatibo sang PRO-6 nga nagatutok sa pagkontrol kag pagpaubos sang kaso sang loose firearms ukon mga ilegal kag wala rehistrado nga armas sa Western Visayas.
Ginpabutyag ni Governor Castro ang importansya sang bukas kag epektibo nga koordinasyon kag komunikasyon sa tunga sang local government unit kag kapulisan agud mangin mas madasig kag epektibo ang pagpatuman sang mga programa para sa kalinong kag seguridad.
Suno sa gobernador, ang maayo nga kooperasyon sang local government unit kag kapulisan makabulig sa pagpauswag sang serbisyo publiko kag sa pagsiguro sang kaluwasan sang mga pumuluyo.
Kaupod ni Governor Castro sa pag-abi-abi kay RD Tuaño sanday 2nd District Congresswoman Inday Baby Jane T. Castro kag CPPO Provincial Director Police Colonel David L. Cachumbo Jr., upod ang iban pa nga mga opisyal sang local government kag mga kabanwahanan kag syudad sa probinsya sang Capiz.
Kabahin sang pagbisita ang padayon nga pagpalig-on sang koordinasyon sa tunga sang kapulisan kag local government unit para sa pagpatuman sang mga programa nga nagatutok sa kalinong, seguridad kag proteksyon sang mga pumuluyo.
