Ginapabaskog sang Police Regional Office 6 ang Oplan Sagip Bata sa Western Visayas agud maprotektahan ang mga menor de edad nga nagamaneho sang motorsiklo kag iban pa nga salakyan batok sa vehicular accidents.
Sa interview sang Bombo Radyo kay PMAJ Lailyn Sencil, spokesperson sang PRO 6, iya ginpahayag nga kada weekend nagapatigayon sila sang checkpoint operations bilang kabahin sang ila inisyatibo para sa safer cities, bangod madamo nga menor de edad ang nagamaneho nga wala sang lisensya kag protective gears.
Suno kay Sencil, 273 ka menor de edad ang nadakpan sa region-wide operation bangod sa paglapas sang mga traffic ordinances, nga nagalakip sang 42 sa Aklan, 36 sa Antique, 38 sa Capiz, 8 sa Guimaras, 102 sa Iloilo Province, 32 sa Iloilo City, kag 15 sa Regional Mobile Force Battalion.
Ginpahayag man niya nga ang mga nadakpan nga menor de edad ginhatagan sang warning kag multa depende sa ila ginlapas nga traffic ordinance.
Nagapangabay si Sencil sa mga ginikanan nga magbinuligay sa kapulisan sa paggiya sa ila mga kabataan agud masiguro ang husto kag luwas nga paggamit sang motorsiklo kag iban pa nga salakyan.
