Nagsinapol ang Police Regional Office 6 (PRO-6) kag Capiz Police Provincial Office (CPPO) agud mapadasig ang imbestigasyon sa pagpangluthang kay Police Captain Rian Ampoyos nga miyembro sang 1st Capiz Provincial Mobile Force Company, nga ginluthang sa sulod sang isa ka KTV bar sa Barangay Binuntucan, Pontevedra, Capiz.
Ang biktima amo si Police Captain Rian Ampoyos, 48 anyos kag residente sang Barangay Swa, President Roxas, Capiz.
Ang ginatudlo nga suspek amo si William Deocampo, 38 anyos, residente sang Passi City kag nakapangasawa sang taga-Barangay Jolongajog, Pontevedra, Capiz.
Sa interview sang Bombo Radyo kay Police Major Lailyn Sencil, spokesperson sang PRO-6, iya ginpahayag nga nagtukod na ang CPPO sang Special Investigation Team (SIT) nga magatutok sa imbestigasyon agud mapadali ang pagsulbar sang kaso.
Ginklaro man ni Sencil, nga nagkadto si Police Captain Ampoyos sa KTV bar bangud gin-imbitar siya sang tag-iya sang establisemento agud magbulig sa pagpatigayon sang peace in order sa lugar.
Dugang pa ni sini, nga kon mapamatud-an nga may nalapas nga polisiya ukon regulasyon ang mga pulis nga nalakip sa insidente, mahimo ini nga mangin basehan sang administratibo nga kaso.
