Ginpasangkad sang Police Regional Office 6 (PRO-6) ang mga tikang sa seguridad kag paghatag sang publiko nga serbisyo agud masiguro ang luwas kag organisado nga pagbukas sang klase para sa School Year 2026–2027 sa bug-os nga Western Visayas.
Sa pagpanguna ni PBGen. Randulf T. Tuaño, Acting Regional Director sang PRO-6, ginpatuman ang malapad nga preparasyon sa seguridad para suportahan ang matalunsay nga pagbukas sang 2,981 ka pampubliko kag pribado nga eskwelahan sa rehiyon.
Agud mapabakod ang presensya sang kapulisan sa komunidad, nagbutang ang PRO-6 sang Police Assistance Desks sa mga estratehiko nga lugar malapit sa mga eskwelahan kag terminal.
Gin-deploy man ang 1,911 ka personnel nga nagalakip sang mga pulis kag force multipliers sa nagkalain-lain nga bahin sang Western Visayas.
Ginpabakod man ang foot kag mobile patrol operations agud malikawan ang kriminalidad, matalunsay ang trapiko kag makahatag sang gilayon nga bulig sa mga estudyante, ginikanan, manunudlo kag mga commuter sa tion sang pagbukas sang klase.
Suno kay Tuaño, handa ang kapulisan nga magsiguro sang kaluwasan kag kasiguruhan sang mga estudyante samtang nagabalik sila sa ila mga eskwelahan.
Gindugang pa sini nga ginmandu-an na ang tanan nga police units nga magpadayon sang mabaskog nga presensya sa mga school zone kag iban pa nga lugar nga masami ginakadtuan sang mga estudyante kag commuters.
Magapadayon man ang malapit nga koordinasyon sa mga administrador sang eskwelahan, lokal nga mga gobyerno, mga opisyal sang barangay kag iban pa nga mga stakeholder agud masabat gilayon ang anuman nga concern sa seguridad sa pagbukas sang klase.
Luwas sa pagdeploy sang seguridad, magapadayon man ang PRO-6 sa pagsuporta sa mga programa sa road safety, anti-bullying awareness, emergency preparedness kag pagpugong sa ilegal nga droga pinaagi sa pagbinuligay sang mga partner agencies kag mga institusyon sang edukasyon.
Suno pa kay Tuaño, kabahin ini sang responsibilidad sang kapulisan nga mangin kaupod sang mga eskwelahan, ginikanan kag komunidad sa pagpatigayon sang luwas nga palibot para sa mga estudyante kag sa paghatag sang serbisyo nga madasig kag mabatyagan sang publiko.
