ROXAS CITY – Padayon nga ginahulat sa karon sang Police Regional Office 6 ang dugang nga imbestigasyon sang mga kapulisan sa natabo nga aksidente sa Barangay Ondoy, Ivisan, Capiz nga ginkapatay sang duha ka mga frontliners kag pagkapilas sang apat ka mga indibidwal lakip na ang hepe sang Dumalag Municipal Police Station.
Sa interview sang Bombo Radyo Roxas kay Police Lieutenant Colonel Joem Malong, tagpamababa sang Police Regional Office-6, “spot report” palang tubtob sa karon ang ginahawiran nila nga report gikan sa Capiz Police Provincial Office.
Ginpahayag sini nga magapakig-angut pa ini sa Capiz-PPO agud makakuha sang dugang nga imbestigasyon nga ginapatigayon sang Ivisan Municipal Police Station.
Suno diri nga kinahanglan magpatigayon sang maid-id nga imbestigasyon ilabi na gid kag imbolbado ang isa ka hepe sang pulis.
Dugang pa sini nga nagadepende sa imbestigador nga nagaimbestiga kun ano ang marekomendar sini nga bayolasyon kag criminal charges nga posible mapasaka kung magaguwa sa imbestigasyon nga isa ang katapo sang police sa balasulon antes pa man mapalab-ot sa talatapan sang PRO-6.
Sandig diri nga wala pa sang magaserbi nga witness sa nasambitan nga aksidente.
Ginpasalig naman ni Malong nga apisar imbolbado ang isa ka pulis lauman nga patas sa gihapon ang mangin resulta sang ila nga imbestigasyon.
