ROXAS CITY – Nagpanugyan sa karon ang spokesperson Sang Police Regional Office 6 sa sin-o man nga nagasiling nga may iregularidad sa ginpatigayon nga police operation kasubong sang drug buy bust operation nga pormal nga magfile sang complaint sa ila nga talatapan.
Ginhimo ini nga pahayag ni Police Lt. Col. Joem Malong kasunod sang report nga indi drug buy bust operation ang natabo sa pagdakup sa isa ka 21-anyos nga senior high school student sa Sito Bliss, Barangay Cagay, Roxas City sang damlag lang bangud ginpang-ukay pa ang kagamitan sa balay kag nagkaladula pa ang alahas kag kuwarta sa balay.
Suno sa opisyal nga mas maayo nga magfile sang complaint sa ila talatapan ang nagapati nga may ireguridad nga natabo sa ginpatigayon nga operasyon agud ini ang ma-imbestigahan kag maaktuhan.
Ginpahayag pa ni Malong nga ang pamaagi lamang agud magguwa ang kamatuoran amo ang pag-imbestigar sa concerned nga mga PNP personnel.
Ginpasiguro man sini nga wala sang whitewash nga matabo pananglitan may yara sang magreklamo batuk sa mga pulis.
Pamatood diri ang pagdismiss sa serbisyo sang damlag lang sa walo ka PNP personnel nga napamatud-an nga nakasala.
Samtang pananglitan may kahadluk nga magsugid ang tagreklamo sa PRO-6 mahimo sila nga magfile sang complaint sa NAPOLCOM.
