Ginapabaskog sang Police Regional Office 6 (PRO-6) ang kampanya batok sa loose firearms pinaagi sa ila ginapatigayon nga Project RTT ukon Restrict, Track and Turn-In, nga nagresulta sa pag-recover sang 1,521 nga mga armas sa sulod sang tatlo ka bulan.
Sa interview sang Bombo Radyo kay PMAJ. Lailyn Sencil, Spokesperson sang Police Regional Office 6, iya ginpahayag nga 107 sa kabug-usan nga numero ang nakumpiska sa nagkalain-lain nga law enforcement operations, samtang 1,311 naman ang boluntaryo nga gin-surrender sang mga nagapanag-iya sini.
Suno kay Sencil, may 103 ka mga armas nga gin-deposito sang mga tag-iya samtang gina-process nila ang pag-renew sang lisensya.
Pahayag pa niya, may mga explosive devices man nga na-recover sa sulod sang tatlo ka bulan, nga nagalakip sang lima ka nakumpiska kag 273 nga boluntaryo nga gin-surrender sang mga pumuluyo.
Dugang pa sang natungdan, daku ang bulig kag suporta sang mga Local Government Units (LGU) kag mga barangay officials sa pagpatuman sang kampanya, bangud sila mismo ang nagapanguna kag nagabulig sa pag-monitor kag pag-engganyo sa mga pumuluyo nga i-turn over ang mga loose firearms.
Ginapanawagan sang PRO 6 ang publiko nga indi paggamiton ang mga armas sa paghimo sang krimen kag iban pa nga iligal nga aktibidad, kag kun may kahadlok ukon pagduha-duha sa pag-turn over sang armas, mahimo makapalapit sa mga barangay officials agud mabuligan sa insakto nga pag-surrender sini.
