Nagdangat sa masobra 6,000 gramos ang kabug-osan nga nakumpiskar nga illigal nga droga sang Police Regional Office (PRO)-6 sa bilog nga Western Visayas sa bulan sang Hulyo 2025.
Base sa datos sang PRO-6, 6,081 gramos sang ginapatihan nga shabu ang nakuha sa mga operasyon, samtang 30 gramos sang marijuana man ang nakumpiskar.
Ini ang kabahin sang nangin resulta sang 130 ka anti-drug operations nga ginpatigayon sa rehiyon sa sulod sang isa ka bulan.
Sa nasambit nga mga operasyon, 171 ka individual ang nadakpan — 61 diri ang ginkabig nga High-Value Individuals (HVIs) kag 110 naman ang Street-Level Individuals (SLIs).
Ginapangunahan sang Iloilo City Police Office (ICPO) ang may pinakadamo nga nadakpan nga drug suspects nga naglab-ot sa 88 ka indibidwal. Ginsundan ini sang Iloilo Police Provincial Office (IPPO) nga may 33 ka arestado, kag tig-16 naman ang nalista sang Regional Police Drug Enforcement Unit (RPDEU) kag Capiz Police Provincial Office (CPPO).
Ang mga nadakpan nga suspek magapangatubang sang kaso nga paglapas sa Republic Act 9165 ukon ang Comprehensive Dangerous Drugs Act of 2002.
Nagpasalamat man si PRO-6 Regional Director PBGEN Josefino D. Ligan, sa padayon nga suporta sang pumuluyo nga daku gid nga bulig sa pagpasangkad sang kampanya kontra iligal nga droga sa Western Visayas.
