PONTEVEDRA, CAPIZ – Gin-athag ni Police Brigadier General Randulf Tuaño, Director sang Police Regional Office (PRO) 6 nga ginadumilian ang mga pulis nga magsulod kag mag-inom inom sa mga bar kag nightclubs — on duty man ukon off duty.
Sa interview sang Bombo Radyo kay Tuaño, iya ginpahayag nga gina-imbestigaran pa sang Capiz Police Provincial Office kun nag-inom sang makahulubog nga ilimnon ang tatlo ka mga pulis sa KTV Bar sa Barangay Binuntucan, Pontevedra, Capiz antes natabo ang pagluthang-patay kay Police Captain Rian Ampoyos, myembro sang First Capiz Provincial Mobile Force Company.
Suno sa Regional Director, sandig sa panaysayon sang tag-iya sang KTV Bar, gin-imbitar niya ang isa ka Police Corporal nga iya abyan agud istoryahan ang peace and order bangud may mga tion nga may mga customer nga nagasulod nga may mga armas.
Pahayag niya, las 4:30 sang hapon sang Domingo sang nag-abot sa KTV Bar ang Police Corporal, Police Staff Sergeant kag si Police Captain Ampoyos kag nag-istorya sa tag-iya.
Gin-athag ni Tuaño nga off duty ukon wala sang trabaho sang amo nga tion ang tatlo ka mga pulis.
Sandig sa imbestigasyon sang kapulisan, may yara sang komosyon sa likod nga lamesa sang mga pulis sa diin ang mga suspek man ang nagabinaisay.
Sang amo nga tion, si Ampoyos ang nagapungko, ang isa ka pulis ang naga-videoke samtang ang isa ang yara sa guwa sang KTV Bar.
Nagpalapit ang empleyado sang KTV Bar kay Ampoyos kag naghingyo nga i-check ang mga nagabinaisay bangud ginaalegar nga may yara sila sang armas.
Ginsaway ni Ampoyos ang mga suspek apang ginluthang ini kag naigo sa Nawala nga dughan.
Nakapalagyo ang duha ka mga suspek samtang ang isa nga si William Deocampo ang nadakpan sang kapulisan.
Sandig sa mga impormasyon sang Bombo Radyo, si Deocampo ang involved sa hold up incident sa isa ka gasolinahan sa Barangay Lawaan, Roxas City sang tuig 2022.
May mga kaso ini nga ginpangatubang sadto kaangay sang murder, paglapas sa Republic Act 10951 ukon ‘Comprehensive Dangerous Firearms and Ammunition Regulation Act’ sa Passi, Iloilo, Reckless Imprudence kag Death Threat sa President Roxas, Capiz, kag ginaalegar involved man sa robbery case sa Pontevedra, Capiz.
