Nakakumpiska ang Police Regional Office 6 ukon PRO6 sang 733 ka mga armas luthang sa sulod lamang sang 24 oras nga kabahin sang kampanya kontra sa illegal nga mga loose firearms sa Western Visayas.
Sa interview sang Bombo Radyo kay Police Major Lailyn Sencil, spokesperson sang PRO6, iya ginpahayag nga sa nasambit nga numero, 728 ka mga armas ang boluntaryo nga ginsungka sang mga tag-iya sini sa kapulisan.
Ini ang pinakamadamo nga firearms surrender nga narekord sang PRO6 sa sulod sang isa ka adlaw.
Dugang pa ni Sencil, nagpatigayon man ang PRO6 sang tatlo ka operasyon sa idalom sang Application for Deposit of Firearms with Expired Registration ukon ADFER, nga nagresulta sa pagdeposito sang duha ka armas kag pagsungka sang isa pa ka armas sa mga otoridad.
Ang kampanya nga ginpatigayon sa idalom sang RTT 3389, nga nagakahulugan sang Restrict, Track, and Turn-in.
Pinaagi sa amo nga programa matapna ang mga ilegal nga armas kag indi rehistrado nga mga pusil.
