ROXAS CITY-Ginpasiguro sang Provincial Disaster Risk Reduction and Management Office (PDRRMO) nga preparado ang probinsiya sang Capiz pananglitan nga maglaslas ang Bagyong Rolly sa probinsiya.
Sa interview sang Bombo Radyo sa kay Provincial Disaster Risk Reduction and Management Officer Mrs. Judy Grace Pelaez ginapahayag sini nga apisar indi direkta nga maagyan sang Bagyong Rolly ang probinsiya sang Capiz, ginpakamaayo sang Provincial Disaster Risk Reduction and Management Council nga preparahan ang amo nga bagyo.
Suno sa kay Pelaez may yara na sang mga available nga mga buluthuan nga magaserbe nga evacuation centers nga mahimo tiniran sang mga evacuees.
Bastante man suno diri ang mga relief goods nga mahimo ipanghatag sa mga evacuees nga magatinir sa mga evacuation centers.
Gindugang pa sini nga naka alerto man ang mga emergency responders sa tion sang emerhensya sa kasagsagan sang bagyo.
Ginpasiguro man ni Pelaez nga pagabantayan sang talatapan ang mga kabanwahanan nga masami ginabaha kag ginatunaan sang mga landside kag iban pa.
Ginkompirmar man sini nga may pila na ka mga indibidwal ang nagpatigayon sang preventive-evacuation ihilabi na ang mga nagapuyo malapit sa mga baybayon.
Samtang nagpanawagan naman sang kooperasyon si Pelaez sa mga pumuluyo sa probinsiya
Mahibaluan nga sa pinakaulihe nga impormasyon gikan sa PAGASA, ginalauman nga magtupa sa kadutaan nga sakup sang Aurora-Quezon ang Bagyong Rolly sa maabot nga Domingo nga adlaw.
Sa pihak nga indi sini direkta nga maagyan ang probinsiya sang Capiz, ginalauman naman ang mamunog nga ulan nga posible maeksperyinsiyahan sang probinsiya.
