ROXAS CITY – 100% na nga apektado sang sakit nga African Swine Fever (ASF) ang probinsya sang Capiz.
Ini ang nangin pahayag ni Dr. Leonel Abordo Provincial Veterinarian sang mainterview sang Bombo Radyo.
Suno kay Abordo, ang banwa na lamang sang Jamindan ang wala pa sang positibo nga resulta sa laboratory sa amu nga sakit.
Mahibaluan nga nagdangat na sa masobra P400-M ang ginbilin nga halit sang ASF sa bilog nga probinsya.
Gintuad man sini kun ngaman ang probinsya sang Capiz ang may pinakamadamo nga kahalitan, ini bangud ginlakip sa damaged ang mga baboy nga gindala sa emergency slaughter ukon ang mga nakitaan sang pila ka mga sintomas apang, wala pa nakumpirmar kun ini bala ang apektado sang amu nga virus.
Dugang pa nga nabudlayan ang mga hog raiser nga magd-isposed sang ila nga baboy sang tion nga nagtupa ang ASF sa probinsya bangud halos tanan nga gina-agyan sang shipment ang ginsarado.
Ginpahayag man ni Abordo nga indi pa mahimo nga makabalik sa pag-atipan sang baboy ang mga hog raiser bangud posible madugangan lamang ang ila kapiyerdihan apang ginklaro sini nga sa tion may yara na sa bakuna batuk diri, wala na sang kinahanglan nga kabalak-an pa.
Pag-abot naman sa suplay sang baboy nga ginabaligya sa merkado publiko, ini ang nagikan suno diri sa mga kaiping nga probinsya nga yara sa red zone buot silingon apektado man sang amu nga sakit.
Nagalaum man si Abordo nga kun tani may bakuna na nga maga-abot sa probinsya bilang kontra batuk sa amu nga sakit kag agud makasugod na sa rehabilitation kag mabalik ang nadula nga kantidad sa mga negosyante.
