Liwat nga ipatuman sang gobyerno probinsiyal ang compressed four-day work week sa mga talatapan sini bangud sa tuman nga init sang panahon nga may kaangtanan sa epekto sang Super El Niño.
Ini suno sa ginpirmahan nga Memorandum Order No. 211, Series of 2026, nga may kaangtanan sa Memorandum Circular No. 114, Series of 2026 nga ginpagwa sang Office of the President, nahanungod sa 40-oras nga pagpanarbaho sang mga empleyado sang gobyerno sa sulod sang apat ka adlaw kada semana.
Sa idalom sang bag-o nga work arrangement, magasugod alas-7:30 sang aga tubtob alas-6:30 sang gab-i ang trabaho sang mga empleyado, Lunes tubtob Huwebes, nga may isa ka oras nga lunch break.
Nahibaluan nga katuyuan sang amo nga tikang nga mabuligan ang mga empleyado nga malikawan ang sobra nga pagpabutyag sa tuman nga init sang panahon, samtang mapadayon gihapon ang kinahanglanon nga serbisyo sang gobyerno.
Samtang, indi sakop sang compressed work schedule ang mga frontline personnel nga nagahatag sang direkta nga serbisyo sa ikaayong lawas sang publiko kag magapabilin sa ila regular nga work schedule.
Apang, ang mga administrative staff sang ospital sakop sang pagpatuman sang compressed four-day work week.
