ROXAS CITY – Magapakigbahin ang probinsya sang Capiz sa pagahiwaton nga una nga beses nga RAJAH Pilipino Pageant sa masunod nga tuig.
Sa interview sang Bombo Radyo kay Mr. RJ Demaisip Provincial Director sang RAJAH Pilipino Capiz, ginpahayag sini nga ini ang una nga beses nga pasinawan nga igapatigayon sang RAJAH Pilipino nga pagahiwaton sa Maynila.
Suno kay Demaisip sadtong Capiztahan 2023, nakahinala sini ang tag-iya sang amu nga aktibidad kung sa diin gin-imbitahan nga mahimo magpasakop ang probinsya.
Bangud sini, gilayon nga naghikot sang pila ka mga tikang ang probinsya agud magpatigayon sang screening sa tanan nga may huyog nga magpakigbahin diri.
Mahibaluan nga nag-agi sa maid-id nga interview kag pagsinalaay ang tanan nga mga kandidato tubtob nga makuha ni John Hazon Beter ang titulo nga magarepresentar sang Capiz.
Ang nasambit nga pageant ang pagahiwaton sa Enero 9 tubtob 13, 2024.
Sa interview sang Bombo Radyo kay Beter, ginpakigbahin sini nga indi na bag-o sa iya ang mga kasubong sini nga patag bangud anay na siya nga nagapakigbahin sa mga barangay kag school pageant.
Si Beter isa ka tumandok sang Barangay Daga, Panay, Capiz kag 3rd year student sa kurso nga Electrical Engineering.
Suno pa diri, dako nga impact para sa iya nga dal-on kag irepresentar ang pangalan sang probinsya bangud daw ka san-o lang nga madamo nga mga tawo ang nagdiskriminar sa iya rason agud magtulod nga indi mag-untat sa iya ginahandum.
Hugot man nga ginsiling sang kandidato nga 10 out of 10 ang iya pagsalig kag kaisog nga magpakigbahin sa amu nga pageant, bangud dako ang iya pagpati nga kun may yara ka sang pagsalig sa imu kaugalingon wala sang imposible sa tanan nga butang.
Ang RAJAH Pilipino Pageant, may yara na sa karun sang 40 ka mga kandidato kag padayon sa gihapon nga nagabaton sa mga may luyag pa nga magpakigbahin.
Apisar sa masunod pa ini nga tuig, naga-amat-amat na sila suno diri sa pagpadulong sa tagsa ka mga banwa agud magpangayo sang suporta sa mga alkalde bilang bulig.
Samtang, pananglitan nga magdaog sa amu nga pasinawan may yara ini suno diri nga igatan-ay nga International Pageant kag incentives.
Mensahe ni Beter sa tanan nga may huyog kag handum sa kasubong sini nga patag, magbakas, salig sa kaugalingon kag indi magkalipat nga magpangayo sang giya sa mahal nga makaako.
