Magapatigayon ang Probinsya sang Capiz sang Earth Hour 2026 bilang kabahin sang nagapadayon nga kampanya para sa pag-amlig sang palibot kag pagkinot sang enerhiya.
Sa interview sang Bombo Radyo kay Ernesto Federiso, Officer-in-Charge sang Provincial Environment and Natural Resources Office, iya ginpahayag nga ang Earth Hour 2026 isa ka global environmental movement nga gin-organize sang Worldwide Fund for Nature ukon WWF.
Suno sa iya, minilyon ka mga tawo sa bug-os nga kalibutan ang naga-upod sa sini nga inisyatibo paagi sa pagpatay sang mga indi kinahanglanon nga suga, appliances kag iban pa sulod sang isa ka oras halin las-8:30 tubtob las-9:30 sang gab-i—agud mapakita ang ila suporta sa planeta kag sa kampanya batok sa climate change.
Pahayag pa niya, dako ang papel sang mga kabataan sa pagbulig sa pagpalapnag sang awareness sa pag-atipan sa palibot, ilabi na nga nabatyagan na ang epekto sang climate change kaangay sang pagbaha kag iban pa nga mga kalamidad.
Gina-agda man sang natungdan ang tanan nga mga pumuluyo, pribado nga sektor, kag mga ahensya sang gobyerno nga magkooperar sa aktibidad agud labi pa nga mapabaskog ang proteksyon sa palibot.
Nagalaum man ini nga sa padayon nga partisipasyon sang komunidad sa kasubong nga mga tikang, labi pa nga madugangan ang ihibalo kag responsibilidad sang tagsa-tagsa sa pag-amlig sang palibot para sa mas luwas kag tayuyon nga palaabuton.
