Probinsya sang Capiz, mahimo nga makabaton sang Bivalent vaccine nagikan sa DOH; mga indibidwal nga mahimo makakuha, kinahanglan nga nakatapos sang 1st kag 2nd dose vaccine batuk COVID-19

ROXAS CITY – Makabaton ang probinsya sang Capiz sang Bivalent vaccine nagikan sa Department of Health (DOH) bilang 3^rd booster para sa COVID-19.

Kinahanglan lamang nga nakatapos na sang 1^st kag 2^nd dose ang mahimo nga makakuha sini bilang 3^rd dose nga booster batuk sa COVID-19.

Sa interview sang Bombo Radyo kay Dr. Ramon Nolasco Provincial Health Officer II, ginpahayag sini nga isa ini sa mga kinahanglan antes nga makakuha sang nasambit nga booster.

Gani panugyan ni Nolasco sa publiko partikular ang mga wala pa nakapa-vaccine ukon nakapabooster mahimo na nga magpadulong sa ila tagsa ka mga rural health center, bangud dako ini nga bulig suno diri nga malikawan ang paglaton sang COVID-19.

Suno diri nga apisar naganubo na ang numero sang kaso sang makahalalit nga virus, kinahanglan sa gihapon nga ipabilin ang pag-implementar sang minimum public standard, paggamit sang facemask kag long distancing.

Pinaagi sini, mabuligan nga mapanubo ang kaso sa probinsya.

Mahibaluan nga ang  probinsya sang Capiz ang may pinakamanubo nga kaso sang COVID-19 sa bug-os nga Region VI.

Bangud sini, ginaganyat ni Nolasco ang tanan nga magkooperar kag magsunod sa pila ka mga ginapatuman sang gobyerno kaupod sang tagsa ka mga Barangay officials, Local Government Unit kag iban pa nga mga ahensya nga nagabulig kag nagaduso sang mga pagsulundan agud amligan ang ikaayong lawas.