ROXAS CITY – May yara pa sa gihapon sang kaso nga African Swine Fever (ASF), ang probinsya sang Capiz kabangdanan sa pagkamatay sang pila ka mga baboy nga ila ginahuptan.
Sa interview sang Bombo Radyo kay Dr. Leonel Abordo Provincial Veterinarian, ginpahayag sini nga may mga report sa gihapon sila nga nababaton nagikan sa nagkalain-lain nga mga kabanwahan nga nagakamatay ang ila hinuptanan nga baboy.
Pila sa mga rason sini ang senyales kag sintomas sang ASF.
Suno kay Abordo, apisar nga nalugi na ang iban nga mga manugbaboy nagpasimpalad sa gihapon sila nga maghupot liwat apang makaligad lamang ang isa ka bulan, nagkalamatay lamang ini.
Apisar ang iban suno diri wala nagapati nga may yara sa gihapon sang ASF sa probinsya, panugyan sini nga indi magpakampante bangud indi mapaktan ang lakat sang tyempo kag ipabilin nga masami tsekyaron ang mga hinuptanan.
Ginpahayag ni Abordo nga 4 tubtob 5 ka bulan antes madula ang virus sa lugar kung sa diin ini nakontamina.
Isa man ini sa mga rason kung ngaman tubtob subong wala sa gihapon nagahulag ang gobyerno probinsyal para sa restocking sang mga baboy, bangud may posibilidad sa gihapon suno diri nga mausik lamang ang kwarta nga igastos pananglitan nga magkalamatay lamang ang mga baboy kag indi pa clear ang probinsya sa nasambit nga virus.
