ROXAS CITY – Nagapabilin nga positibo sa gihapon sa Paralytic Shellfish Poisoning (PSP) ukon red tide ang probinsya sang Capiz.
Ini ang ginkumpirmar ni Mr. Edwin Javier Provincial Director sang
Bureau of Fisheries and Aquatic Resources sang mainterview sang Bombo Radyo.
Suno kay Javier wala sa gihapon naganubo ang lebel sang red tide sa probinsya ilabi na sa mga coastal areas.
Bangud sini, padayon ang ila pagpahanumdum sa mga manugpanginhas, manugbaligya, manugbakal kag sa publiko nga dumilian kag likawan nga magkaon sang anu man nga sahi sang shellfish agud malikawan ang malain nga epekto sini sa lawas.
Mahibaluan nga may pila na ka mga indibidwal ang ginpadangat sa nagkalain-lain nga ospital sa probinsya bangud sa pagkaon sang mga panginhason nga apektado sang red tide.
Pahayag pa sang Provincial Director nga may yara sila sang mga gadgets nga makabulig sa ila agud mamonitor ang lebel sang red tide sa isa ka lugar.
Panugyan sini sa publiko, magsunod lamang sa mga ginapatuman nga pagsulundan sang gobyerno probinsyal.
