ROXAS CITY – Nakabalhag na ang probinsya sang Capiz sang tatlo ka mga kaso sang Japanese Encephalitis virus nga nagikan sa banwa sang Dao, Ivisan kag syudad sang Roxas.
Sa interview sang Bombo Radyo kay Mr. Joeffrey Espiritu tagpamaba sang Department of Health (DOH) Capiz gintuad sini nga ang Japanese Encephalitis virus isa ka viral disease ukon brain infection nga dala sang mga lamok nga nangin rason sang pagpalanghubag sang inflammation sang utok sang isa ka indibidwal.
Masami nga gina-igo sini ang mga lapsag kag mga kabataan, isa man ini ka flivavirus nga kaparehas sang ginatunaan nga Dengue, Yellow Fever kag West Nile Viruses.
Suno kay Espiritu mas malala ang nasambit nga virus ikumparar sa Dengue kag mahimo nga maka-eksperyensya sang pila ka mga sintomas sa tion nga makagat sang lamok sa sulod sang 5 tubtob 15 diyas.
Pila sa mga sintomas kag senyales sang Japanese Encephalitis virus amu ang lagnat, sakit sang ulo kag pagpalanuka.
Kun nangin malala na ang sakit, mahimo nga maka-ekspereyensya ang isa ka indibidwal sang mataas nga lagnat, sakit sang ulo, stiff neck, wala sa kaugalingon, coma, kombulsyon, pagpalaminhod sang lawas kag mahimo nga magresulta sa kamatayon.
Bangud sini, kinahanglan suno kay Espiritu nga sa tion maka-eksperyensya sang sang hilanat sa sulod sang duha ka adlaw, gilayon nga magpa-check-up kag indi ini kinahanglan nga pagpa-uyangan.
Matandaan nga sadtong 2022, nakabalhag man ang probinsya snag Capiz sang 3 ka mga kaso sa diin nagikan sa banwa sang Dao kag Ivisan.
Sa datos nagikan sang ahensya masami nga apektado sang amu nga sakit ang mga kabataan nga naga-edad 5 ka tuig tubtob 17-anyos.
Panugyan sini sa mga pumuluyo ilabi na sa mga ginikanan, ipabilin ang katinlo sa puluy-an kag sa palibot, likawan man ang mga aktibidad nga ginahiwat sa guha sa tion sang tig-ululan.
