Nakabaton sang walo ka mga awards ang Probinsya sang Capiz sa Pagdáyaw 2025: Western Visayas Tourism Awards nga ginhiwat sang Marso 5 sa bahin sang Iloilo City.
Sa interview sang Bombo Radyo kay Mr. Alphonsus Tesoro, head sang Capiz Provincial Tourism and Cultural Affairs Office (PTCAO), iya ginpahayag nga daku nga kadungganan para sa probinsya ang pagbaton sang nasambit nga mga award nga nagapakita sang padayon nga pag-uswag sang turismo sa Capiz.
Suno kay Tesoro, lakip sa mga ginbaton nga pagkilala amo ang Best Tourism-Oriented LGU – Excellence Award in Tourism Governance and Development, Tourism Champion in Product Development, Tourism Champion in Promotion of Multi-Dimensional Tourism Products,Tourism Champion in Gender Mainstreaming, Model Provincial LGU in Local Statistics, Database Management and Reporting,Tourism Mover Award, Tourism Industry Skills Program Award kag Tourism Partner in Championing Slow Food in Western Visayas.
Pahayag pa niya ,ang nasambit nga mga pagpasidungog ang resulta sang pagbinuligay sang Provincial Government of Capiz, tourism stakeholders kag sang mga Capiznon nga padayon nga nagasuporta sa pagpauswag sang industriya sang turismo sa probinsya.
Nahibaluan nga ginkilala man si Mr. Alphonsus Tesoro bilang sole recipient sang Lifetime Achievement Award bangud sang iya 24 ka tuig nga dedikasyon sa serbisyo publiko sa pagpasangkad sang turismo.
Nagpasalig man ang natungdan nga padayon ang ila pagpalig-unon sang mga programa kag inisyatibo nga magabulig sa mas makabulig sa pag-uswag sang turismo kag ekonomiya sang probinsya sang Capiz.
