ROXAS CITY – Wala sang nabalhag nga kaso sang Covid-19 ang probinsya sang Capiz as of April 05, 2022 kag wala naman sang may napagkit nga ginbawian sang kabuhi apang yara na sa 12,347 ang kabug-usan nga kaso sang nasambit nga balatian sa probinsya.
Ini ang ginpahayag ni Mr. Joeffrey Espiritu, tagpamaba sang DOH-Capiz sang ma-interview sang Bombo Radyo.
Ginpahayag sini nga padayon ang ila pag-monitor kag surveillance sa mga pumuluyo nga posible naga-eksperensya sang mga sintomas sang Covid-19.
Suno diri, nga adlaw-adlaw sila nagakuha sang update sa kada banwa natuhoy sa kaso sang nasambit nga balatian.
Sa pihak nga bahin, ginpahayag ni Espiritu nga padayunon ang pagsunod sa mga ginapatuman nga minimum health protocols samtang naga-selebrar sang semana santa.
Nagapangabay man ini sa mga tumuluo nga indi pagkalipatan nga magsuksok sang face mask kun magpadulong sa simbahan kag likawan ang pagdutdutanay sa tion sang prosisyon.
Ginpahayag man sini, nga posible liwat magtaas ang kaso sang covid-19 sa probinsya kun ang mga tawo ang wala nagasunod sa mga protocols nga ginapatuman.
Sa katapusan, ginpahayag ni Espiritu nga magapaguwa ang probinsya sang full wide alert para sa preparasyon sa pagselebrar sang semana santa ilabi na sa mga ospital.
