Wala pa sang kumpirmado nga kaso sang African Swine Fever (ASF) sa probinsya sang Capiz apisar may mga report sang pagkalamatay sang pila ka mga baboy sa nagkalain-lain nga lugar.
Sa interview sang Bombo Radyo kay Dr. Lloyd Burata, Veterinary V sang Capiz Provincial Veterinary Office, ginpahayag sini nga posible nga ang mainit nga panahon ang isa sa mga rason sang pagkalamatay sang pila ka mga baboy.
Suno kay Burata, nagapabilin sa red zone ang probinsya kun sa diin may yara sa gihapon sang mga pagpanghangkat batok sa ASF, gani padayon ang ila nga pagbantay kag monitoring.
Ginpangabay man sini sa mga hog raisers nga magreport dayon sa mga otoridad kun may mga hinuptanan nga baboy nga mapatay agud makuhaan sang sample kag masuri kon may kaangtanan ini sa ASF ukon sa iban pa nga sakit.
Nagpasiguro naman ang Capiz Provincial Veterinary Office nga padayon ang ila nga koordinasyon kag pagmonitor agud maprotektahan ang hog industry sa probinsya.
