ROXAS CITY – Problema sa pagbaha, pigado nga drainage system kag barado nga mga kanal ang pila lamang sa mga problema nga ginpalab-ot sang mga pumuluyo sa Barangay Dayao, Roxas City sa Bombo Patrol 101 sa Barangay sang Bombo Radyo.
Suno kay Henry sang Mercedes Subdivision, dako nga houl sa ila lugar ang masami nga pagbaha ilabi na kun magbubo ang mabaskog nga ulan.
Ginpahayag sini nga sila na lamang mga mga residente ang nagabuligay sa pagtinlo sa kanal agud indi magbara ang tubig.
Ginpasuyupan naman sang water pump ang barado nga mga kanal bangud sang nagabara nga mga basura kag iban pa.
Suno naman kay Charlie Salvador sang Sitio Ilaya, dalayawon ang kooperasyon sang mga pumuluyo sa ila lugar pag-abot sa mga lihok agud maamligan ang ila ikaayong-lawas batuk sa balatian nga dengue.
Ginpahayag sini nga ila ginabahin-bahin ang ila mga basura, nagapaninlo sila sang drainage systems kag mga kanal.
Magluwas diri, ila man ginapang-ula ang mga butang nga may stagnant water nga mahimo pangitlugan sang lamok.
Ginpahayag naman ni Nanay Leonisa sang Sitio Pagutok nga luyag kuntani nila nga mapahamtangan man sang drainage sa ila lugar.
Bangud wala sang drainage, dako nga problema sa mga residente suno sa iya ang pagbaha ilabi na kun magluntad ang mamunog nga pag-ulan.
Suno naman kay Ritchie sang Sitio Cabral nga mas nangin mahinalungon ini kasunod sang iya pagka-ospital bangud sa balatian nga dengue.
Nagpanugyan man ini sa mga pumuluyo nga maghalong sa tanan nga oras, likawan magpadulong sa mga lugar nga madamo sang lamok kag magsuksok sang mahaba nga mga panapton.
