ROXAS CITY – Rehabilitasyon sang drainage ang solusyon agud mauntat ang pagbaha baha sa Malipayon Village, Barangay Tiza, sining syudad sa tagsa ka magbubo ang mamunog nga ulan.
Ginpahayag ni City Councilor Midelo Ocampo nga ba-se sa iya nga pagtsekyar, indi solusyon ang declogging sa drainage sa Block 6, Malipayon Village, Barangay Tiza ang sabat sa madugay na nga problema sang mga pumuluyo sa amo nga lugar sa tion nga mag-ulan, kundi rehabilitasyon.
Nagaguwa sa pagtsekyar ni Ocampo nga bisan i-declog ang drainage sa lugar, indi masolusyunan ang pagbaha bangud ang drainage sa block 6 nga nagakonekta sa drainage sang syudad ang manubo ang elevation.
Sang ginpalab-ot sini ang aktwal ng sitwasyon sa pamunuan sang City Engineer’s Office, nahibaluan sang konsehal nga may ginpa-in na nga pondo para sa rehabilitasyon sang drainage.
Nagapati si Ocampo nga madugay na kuntani ini nasolusyunan kasunod sa pagpungko ni Mayor Ronnie Dadivas kun wala lamang ang COVID-19 pandemic.
Napaiway lamang ini bangud mas ginhatagan sang prayoridad ang paghimo sang nagakaigo nga tikang agud maproteksyunan ang mga pumuluyo sang syudad batuk sa makahalalit nga virus.
