ROXAS CITY – May tagsa-tagsa ka pamaagi ang mga residente sang Barangay Baybay, Roxas City agud matapna ang pagduging sang lamok kag maamligan ang ila ikaayong-lawas batuk sa balatian nga dengue.
Ini ang nahibaluan sa ginpatigayon nga Bombo Patrol 101 sa Barangay sang Bombo Radyo News Team.
Kalakip sa ginpalab-ot nga reklamo sang pila ka mga pumuluyo amo ang nagalapta nga basura, barado nga mga kanal kag masami nga pagluntad sang pagbaha ilabi na kun mag-ulan.
Suno kay Tatay Jun, halos 16 ka mga pamalay ang apektado sa ila lugar sa tagsa ka mag-ulan.
Ila ginakahangaw-an ang pagduging sang lamok kun may tubig-baha ilabi na sa mga kabataan.
Nagalaom ini nga kuntani mapahamtangan sang drainage ang ila lugar agud may mabulhugan ang tubig sa tagsa ka maulanon ang paniempo.
Tuman naman ang pagpasalamat ni Manang Bernadette sang Sitio Lawis nga ginpahamtangan sang drainage ang ila lugar.
Dako sadto nga problema sa ila ang pagbaha kun maulanon ang paniempo.
Suno pa diri nga nagapaninlo sila sa palibot agud wala sang may magbara nga likot sa mga kanal.
Ginareklamo naman sang mga residente sang Sitio Sto. Niño ang madugay nga paghubas sang tubig sa mga dalanon sa tagsa ka magbubo ang mamunog nga ulan.
Suno diri nga nagalab-ot sang duha ukon masopra pa nga inadlaw antes ini maghubas bangud wala sang pagabulhugan sang tubig.
Suno naman kay Leslie, matapos siya nakaangkon sang balatian nga dengue, mas nangin mahinalungon na ini pinaagi sa paggamit sang mosquito net kag mosquito repellant.
Ginatinguhaan man sini nga matinlo ang iya palibot agud malikawan ang pagduging sang lamok.
