ROXAS CITY – Gilayon nga ginsolusyunan sang pamunuan sang Roxas City Integrated Transport Terminal ang masami nga pagdinaguso kag pag-agaway sang mga pasahero sa pagsakay sa mga bus liners sa amo nga terminal.
Suno kay Marlon Veronica, security guard nga naga-duty sa amo nga terminal, madasig nga nagdihon sang tikang ang hepe sang amo nga terminal nga si Mr. Victor Arcenas agud masolusyunan ang nasambit nga problema.
Ginahatagan sang prayoridad nga una makasakay sa mga pampasahero nga salakyan amo ang mga nagabusong, persons with disabilities (PWDs) kag mga senior citizen.
Ginapapila man sang duha ka linya ang mga pasahero antes pa man magsaka sa salakyan agud mangin matalunsay ang ila nga pagsakay.
Aminado si Veronica nga sa tagsa ka peak hour ukon tagpululi masami nagadugok ang mga pasahero kag naga-agaway sa pagsakay sa mga pampasahero nga salakyan ilabi na ang nagabiyahe sang Roxas-Estancia kag Roxas-Balasan.
