ROXAS CITY – Aminado ang chief of hospital sang Mambusao District Hospital nga si Dr. Florencio Luching nga problema gidman ang tubig sa amo nga ospital.
Kasunod ini sang ginpalab-ot nga reklamo sang pila ka pasyente kag ila pamilya sa Bombo Radyo natuhoy sa ila kabudlayan sa paggamit sang tubig sa amo nga pasilidad.
Suno kay Luching, madugay na ang ini nga problema bangud mahina ang suplay sang tubig indi lamang sa ospital kundi sa mismo banwa sang Mambusao.
Ginpahayag ni Luching nga nagahimo sila sang temporaryo nga solusyon pinaagi sa pagtasok sang deepwell apang ginakulang gihapon ini.
Agud makontrol ang paggamit sang tubig suno kay Luching, ila temporaryo nga ginapatay ang tubod sang tubig sa sulod sang ward kag mga kwarto bangud ginaprayoridad ang iban nga hulot kapareho sang operating room.
Apang nagbutang sila sang gripo malapit sa pirtahan sang entrance kun sa diin mahimo makasag-ob ang pamilya sang mga pasyente.
Nagaapelar sang pag-intiendi si Luching sa pamilya sang mga pasyente bangud suno sa iya nahuman naman nila ang plano para sa water system sang ospital apang ginahulat pa ang pag-operate sang bag-o nga concessionaire sa amo nga banwa.
May yara naman suno sa iya sang pondo para sa pagpaayo sang water system sa amo nga ospital gani ginalauman nga masolusyonan na ang amo nga problema sa ilabing madali nga panahon.
