ROXAS CITY — Kasado na sa maabot nga adlaw sang Martes ang ipatigayon nga committee hearing sang Committee on Public Utilities sang Sangguniang Panlalawigan may kaangtanan sa reklamo sang mga jeepney drivers kag operators sa banwa sang Dumalag sa presensiya sang mga bus liners nga nagabiyahe sa ila ruta.
Suno sa chairman sang komitiba nga si Board Member Jonathan Besa, gilayon niya nga ginhatagan sang pagtamod sang makalab-ot sa sanggunian ang reklamo sang grupo bangud nakita niya nga nagakinahanglan ini sang madasig nga aksiyon.
Mahibaluan nga base sa petisyon sang Dumalag Jeepney Operators and Drivers Association, nakaapekto na sa ila palangabuhian ang presensiya sang mga ceres bus liners nga nagabiyahe Tapaz -Roxas City Vice Versa nga nagalabay sa ila ruta bangud nagakadulaan na ang mga ini sang pasahero.
Kabahin sa mga gin-imbitar sang komitiba sa hearing ang tagdumalahan sang Vallacar Transit Inc., Land Transportation Franchising and Regulatory Board – Region 6, lokal nga gobyerno sang Dumalag, kag ang magkatuhay nga grupo sa sektor sang transportasyon sa probinsiya.
Nagalaum si Besa nga pinaagi sa ila pagsinapol, mahatagan sang solusyon ang ila problema nga indi man masamad ang palangabuhian sang magtimbang nga mga partido.
